Фудбалската репрезентација на Македонија го претрпе третиот пораз во исто толку натпревари во новата сезона на Лигата на нации, откако синоќа во Скопје загуби од Шкотска со 0:2 во третото коло од групата Б1.
Киран Боуви рано им донесе предност на гостите со удар од далечина, а Џон МекГин во 70. минута од пенал го постави конечниот резултат. Казнениот удар беше досуден по игра со рака на Бојан Миовски. Македонија не успеа да постигне гол ниту во завршницата, кога Шкотска остана со играч помалку по исклучувањето на Скот МекКена.
Избраниците на селекторот Гоце Седлоски се последни во групата, без бодови и со гол-разлика 0:7. Претходно загубија од Швајцарија со 0:3 и од Словенија со 0:2. Швајцарија води со девет бода, а Словенија и Шкотска имаат по четири.
Голгетерскиот пост на „црвено-жолтите“ се продолжи на седум натпревари. Последниот погодок го постигнаа на 18 ноември минатата година, во поразот од Велс со 7:1, што значи дека речиси 11 месеци не ја затресле противничката мрежа.
Во следното коло, на 6 октомври, Македонија ѝ гостува на Швајцарија.
Г.М.
Фото: ФФМ | Фејсбук
