Македонија е во транс. “Црвено-жолтите“ го совлада домаќинот Литванија со 67-65 и се пласираа во полуфиналето на Еуробаскетот. Ги нема тие зборови кои можат да ја опишат радоста на македонската нација.
Македонија забележа уште една историска победа, во која сите подеднаково дадоа свој печат. “Црвено-жолтите“ ги предводеше “министерот за одбрана “ Перо Антиќ, кој имаше 9 скока и 8 поени. Самарџиски доминираше под обрачите собирајќи десет топки, најмногу на мечот.
По правило одличен во одбраната беше Војдан Стојаноски, кој беше непогрешлив во нападот биејќи 5 од 5 за тројка. Литванската одбрана немаше решение за Бошко МеккејлеБОвски кој со 23 поени беше најпрецизен на мечот.
Одлучувачки за триумфот беше тивкиот човек во македонскиот состав Владо Илиевски. Бекот на 11 секунди пред крајот погоди тројка која предизвика тишина во салата во која имаше 15 илјади литванци.
Последниот напад беше одбранет, а Илиевски триумфот го надополни со уште еден поен од линијата за слободни фрлања.
Македонија за влез во финалето ќе игра против бранителот на трофејот Шпанија.
М.П.
