Присутните најмногу ги интересираше „кревањето“ на бариерите за слободно патување во Европа, потоа помошта од ЕУ за Македонија за побрзо интегрирање во европското семејство и на крај и датумот за преговори и конечно полноправно членство во ЕУ.
Амбасадорот на Република Германија, Н.Е. Ралф Андреас Брет изјави дека „западен Балкан е сеуште во плановите на Европската Унија, но кога Македонија ќе ги започне преговорите за членство во Унијата зависи од нејзе.“
На прашањето поставено од градоначалникот на Охрид, Александар Петрески, „дали е нешто конкретно сторено од нашето министерство за надворешни работи по прашањето за олеснување и укинување визниот режим?“, министерот Милошоски одговори дека „во првото полугодие од 2007 се очекува ратификување повеќе договори за олеснување на визниот режим, а до крајот на годината и конкретна примена на истите паралелно со воведување на новите пасоши кои ќе бидат од врвен квалитет.“
„Во ЕУ постојат две струи, една британска која фаворизира проширување и една германска која бара исполнување строги критериуми пред земјата да се придружи на ЕУ, но и двете струи се слагаат дека проширувањето е незапирлив процес“ – рече вицепремиерката Габриела Коневска Трајковска. „За жал Македонија изгуби многу време и прилики во последниве 15 години. Добро е што денес и владата и опозицијата се на ист пат и непоколеблив став околу нашата кандидатура за влез во ЕУ“, додаде таа.
Фото: П. Боев
