Предлагачите на новиот закон за заштита од пушењето не го слушнаа гласот на сопствениците на малите продажни објекти, како што се тобако продавниците, киосците, мини маркетите и другите мали семејни бизниси и не ги вградија нивните аргументи во драфт-верзијата на законот која наскоро треба да стигне до Владата, се жалат тие. Уште при објавувањето на првичната верзија на законското решение, малите трговци предупредија дека ќе бидат сериозно економски погодени, што ќе резултира со големи финансиски загуби за нивните бизниси, отпуштање вработени, како и затворање на дел од овие малопродажни објекти.

Иако Министерството за здравство, како предлагач на законот, тврди дека се консултирало со сите засегнати страни и ги зело предвид нивните барања, два месеца подоцна, во дополнетата верзија на предлог-законот, клучните спорни одредби останаа непроменети. Единствено трговците добија шест месеци период за да ги прилагодат објектите на новите барања, но новите обврски за нив значат дополнителни финансиски трошоци, како и губење на приходите од долгорочните договори. Според податоците од бизнис-заедницата, станува збор за повеќе од 4.000 мали и средни претпријатија низ земјата, најчесто семејни бизниси, чија економска одржливост директно зависи од продажбата на тутунски и сродни производи. За голем дел од нив, овие производи претставуваат клучен извор на приходи, особено како резултат на склучените долгорочни договори со добавувачите, стои во реакцијата на малите трговци.

И во новата верзија на предлог-законот останува обврската тутунските производи да не бидат видливи за купувачите, односно да се чуваат во затворени и непроѕирни шкафови. Дополнително, се задржуваат и строгите ограничувања за било каква комуникација или означување поврзано со овие производи во самите продажни објекти.

Овие мерки директно ги погодуваат малите трговци кои во изминатите години инвестирале во уредување на продажните места, опрема и брендирање согласно тогаш важечките прописи. Со новите правила, тие инвестиции практично ја губат својата функција и бараат нови вложувања, што создава сериозен финансиски притисок врз бизнисите кои и онака работат со ограничени ресурси, се вели во реакцијата

Во вакви околности, малите продажни објекти се соочуваат со сериозна неизвесност. Наместо прилагодување на законското решение врз основа на реакциите од терен, предложените измени не носат суштински промени, оставајќи илјадници семејни бизниси пред ризик од затворање и губење на егзистенцијата, предупредуваат малите трговци.

Измените на Законот за заштита од пушење, кои првично беа најавени да почнат да се применуваат од 1 март 2026 година, сè уште не стапија на сила бидејќи предлог-текстот не е донесен во финална форма и се наоѓа во процедура на доработка и усвојување.

Со предложените измени се предвидуваат построги правила за употреба на тутунски и никотински производи, меѓу кои целосна забрана за пушење во затворени јавни простории, вклучувајќи ресторани, кафулиња и барови. Забраната се проширува и на електронските цигари и уредите со загреан тутун.

Од Министерството за здравство постојано повторуваат дека примарната цел на законот е да ги превенира штетните последици од пушењето. Како што претходно соопштија оттаму, по јавната расправа биле доставени повеќе забелешки и предлози од бизнис-секторот и граѓанските организации, поради што текстот на законот се доработува пред да биде доставен на усвојување.

Властите најавуваат дека примената на новите правила ќе се воведува постепено, со период за прилагодување на угостителските објекти и граѓаните пред целосната примена на санкциите.

Г.М.