Големи количини најразличен отпад се расфрлани низ националниот парк Галичица, каде секојдневно никнуваат диви депонии. Од градежен шут до апарати за домаќинство и покуќнина ги нагрдуваат најубавите планински предели, а една од многуте диви депонии се наоѓа на само стотина метри од управната зграда на паркот.
Ништо подобра состојбата не е ниту по течението на реките во сливот на Охридското Езеро кои со себе носат тони неразградлив отпад.
-90% од ова ѓубре доаѓа од населените места по течението на реката Дрим. Правевме во минатото кампањи да го намалиме нивото на отпад но тешко оди, така што за овој отпад што го гледате сите сме виновни, нема дилеми. – вели Аладин Демишоски – спортски риболовец.
Состојбата е алармантна, предупредуваат еколошките и спортските здруженија. Тие имаат проблем да им го објаснат на туристите енормното загадување на животната средина.
-Дури ми е срам да кажам дека сум оттука, ми доаѓа да се правам на три и пол. Нема како да им се објасни на туристите кој го направил тоа, дошле некој деца и фрлиле ѓубре? – едноставно отпадот го има насекаде. – посочува познатиот водител и екологист Жанко З’ш Гиолабоски од клубот за велосипедизам и екологија „З’ш точак авантура“.
Состојбата е загрижувачка и во урбаните средини. Ромската населба во предградието на Струга е затрупана во отпад. Населбата Бејбунар во Охрид, пак, каде има извори со питка вода кои ги користи градскиот водовод е претворена во дива депонија.
-Нема контроли, нема казни, а мислам дека може да се реши, тука да се постават луѓе и народот да се научи дека не треба тука да се фрла. – ни изјави граѓанин кој го затекнавме во населбата Бејбунар.
Проблемот со отпадот и дивите депонии кај нас се провлекува со години. Еколошката свест е на исклучително ниско ниво, надлежните молчат, одговорност нема, а отсуствуваат и мерки за решавање на овој сериозен проблем, кој освен што претставува закана за животната средина, негативно влијае на имиџот на земјата и развојот на туризмот.
Г. Момироски
