Народната банка на Република Северна Македонија денеска донесе одлука за воведување привремена администрација во „Алта банка“ АД Битола со цел целосно заштитување на имотот на банката и сигурноста на штедачите, соопшти гувернерот Трајко Славески на вонредна прес-конференција. Со оваа мерка, централната банка го презема директното управување со битолската банка преку назначени администратори, суспендирајќи ги досегашните органи на управување.
За зачувување на ликвидноста и спречување на масовен одлив на средства, регулаторот воведе временско ограничување за клиентите физички лица. Граѓаните отсега ќе можат да реализираат одлив и плаќања преку картичките издадени од банката до максимален лимит од 10.000 денари неделно. Истовремено, интерните плаќања и трансфери помеѓу сметките во рамките на самата банка остануваат неограничени и за граѓаните и за правните лица.
Гувернерот Славески истакна дека воведувањето администрација е директен одговор на ризиците од сопственичката поврзаност, откако до вчера од банката беа повлечени приближно два милиони евра. Тој појасни дека домашната банка останува стабилна, капитално соодветна и со висококвалитетно кредитно портфолио, а мерката има исклучиво превентивен карактер. Кредитокорисниците беа потсетени дека нивните обврски за отплата на ратите кон банката остануваат непроменети.
Прес конференција на гувернерот на Народната банка
Превирања по падот на матичната банка во Белград
Развојот на настаните следува откако Народната банка на Србија на 30 октомври ѝ ја одзеде дозволата за работа на „Алта банка“ АД Белград поради сериозно влошена финансиска состојба и нарушена ликвидност, активирајќи го процесот на обесштетување на тамошните депоненти до 50.000 евра преку српскиот осигурителен систем.
Српската „Алта банка“ поседува квалификувано учество во домашната „Алта банка“ АД Битола, поранешната Стопанска банка АД Битола, која под ова ново име официјално беше запишана во Централниот регистар во декември минатата година, по добиените регулаторни согласности.
Иако банката во Битола првично уверуваше дека работи редовно како самостојно правно лице со сопствен капитал, целиот случај предизвика силни политички бранувања во земјава. Опозицијата побара итна вонредна контрола, одземање на гласачките права на сопственикот и оставка од гувернерот Славески поради начинот на кој бил одобрен влезот на странскиот капитал, додека од власта уверуваа дека македонскиот банкарски систем е заштитен и строго надгледуван.
Според постојната македонска регулатива, заштедите на физичките лица во домашните банки се законски осигурени преку Фондот за осигурување на депозити (ФОД) до износ од 30.000 евра во денарска противвредност по депонент. Централната банка апелираше јавноста да не подлегнува на шпекулации, нагласувајќи дека привремената администрација е стандарден инструмент за зачувување на стабилноста на финансискиот систем.
OhridNews
