Британскиот актер сер Патрик Стјуарт, незаборавниот капетан Жан-Лук Пикард од „Ѕвездени патеки“ и професорот Чарлс Ксавиер од „Икс-мен“, почина на 28 октомври во Лос Анџелес, на 86 години. Веста ја потврди неговата портпаролка Кели Буш Новак, пренесоа светските медиуми.
Пред да стане едно од најпрепознатливите лица на научната фантастика, Стјуарт изгради значајна театарска кариера. Како член на Кралската Шекспирова компанија, ги толкуваше некои од најсложените драмски ликови, а театарот остана негова страст и по светската слава. Во 2010 година доби витешка титула за придонесот во драмската уметност.
Пресвртницата дојде во 1987 година, со „Ѕвездени патеки: Следната генерација“. Со препознатливиот глас, смиреноста и авторитетот, неговиот Пикард стана симбол на разумно и човечно лидерство. Улогата ја продолжи во четири долгометражни филмови, а подоцна и во серијата „Ѕвездени патеки: Пикард“. На филмското платно остави силен печат и како професорот Ксавиер во „Икс-мен“, вклучително и во „Логан“, додека меѓу другите негови остварувања се „Екскалибур“ и „Теорија на заговор“.
Со емотивни пораки од него се простија колегите. Хју Џекмен го опиша како еден од великаните на сцената и екранот и пријател од кого многу научил. Ијан Мекелен се потсети на неговата отвореност и топлина, а Вилијам Шатнер ги истакна интелигенцијата, достоинството и човечноста што ги внесувал во својата работа.
Џорџ Такеи порача дека Стјуарт инспирирал цела нова генерација да гледа кон посветла иднина за човештвото. Од Marvel Studios, пак, му оддадоа признание за начинот на кој го оживеа професорот Ксавиер и го доближи до генерации обожаватели.
OhridNews
