Со богата културна и свечена програма Општина Охрид oддава почит на делото и значењето на сесловенските просветители Св. Кирил и Методиј чии просветителски вредности оставиле траен белег во словенската култура и духовност.
Во рамки на програмата денес ќе се одржи научна конференција „Континуитетот на Кирилометодиевската традиција изразен во Охридската книжевна школа“ во Конгресниот центар во Охрид со почеток во 10:30. Поздравни обраќања ќе имаат градоначалникот на Охрид, д-р Кирил Пецаков, проф. д-р Маја Јакимовска- Тошиќ, проф. д-р Наташа Аврамовска и проф. д-р Александар Василевски. Од 11:00 часот ќе започне научна сесија со Илија Велев, Маја Јакимовска- Тошиќ, Александар Василевски, Наташа Аврамовска, Соња Стојменска- Елзесер, Славица Петровска- Ѓорѓевска и Ели Лучевска.
Утре на Денот на просветителите, 24 мај, ќе се одржи традиционалната програма „По стапките на светите Кирил и Методиј“, во рами на која ќе биде положено свежо цвеќе пред споменикот на светите браќа и ќе бидат доделени награди за најдобри ученици од основните и средните училишта кои постигнале значајни резултати на регионални и државни натпревари. Во 11 часот ќе се одржат Панихида и свечена приредба во Домот на култура „Свети Кирил и Методиј“.
Во рамки на чествувањата во 12:30 часот ќе биде промовирано и десеттото јубилејно издание на Фестивалот на поезија за деца „Стихувалки“, а вечерта ќе биде заокружена со концерт на учениците од ОМУ „Методи Патче“ и беседа посветена на Светите Кирил и Методиј во црквата „Света Софија“ со почеток во 19:00 часот.
OhridNews
