Декларативните заложби и изјави на одговорните за заштита на културно историското наследство не помагаат да се заштити националното богатство кое речиси секојдневно го пустошат разбојници. Нивна мета се и црквите и џамиите, а деновиве тие покажаа дека без проблем можат да влезат и во музејските згради. За среќа ја одбраа административната зграда на Музејот во Струга, а не објектот во кој е сместена постојана поставка. Истата ноќ крадците упаднаа и во црквата Св. Ѓорѓија во центарот на Струга каде се сместени Галеријата на икони и депо во кое се чува вредното културно наследство од овој крај. Надлежните тврдат дека крадците не успеале да влезат во депото, а за среќа дел од иконите од Галеријата биле испратени на конзервација во Скопје. Што се успеале да одземат дрските разбојници сеуште не се соопштува.
И додека разбојниците рутински оперираат на терен, надлежните за заштита на културно-историското богатство креваат раменици. Немоќни да ги заштитат сите објекти во кои има вредни историски предмети спасот го гледаат во изградба на регионално депо во кое под посебни безбедносни услови ќе се чуваат највредните икони и артефакти од охридско-струшкиот крај. Тие посочуваат дека таков пример има во Корча во соседна Албанија каде највредните предмети од верските објекти од тој регион се чуваат во специјално изграден објект кој покрај софистицирана заштита има и постојана физичко обезбедување.
Горан Момироски
