На уредничката за надворешна политика на „Дневник“, Ивана Костовска, утрово и бил забранет влез во Грција на граничниот премин Богородица. Како што објави весникот новинарката патувала приватно во соседната земја, но грчките гранични власти не и дозволиле да ја помине границата без никакво образложение.
– Грчките службеници на преминот Евзони ме повикаа и ме прашаа кога последен пат сум влегла во Грција и дали сум имала некаков проблем. Им кажав дека пред пред еден месец бев во Лутраки, но дека немав никаков проблем. Тогаш ми кажаа дека нема да ме пуштат да ја поминам граница. Кога ги прашав зошто, ми одговорија дека не знаат и дека тоа ќе ми го кажат во грчкиот конзулат во Скопје. Потоа ми дадоа да потпишам документ во кој пишува дека во грчкиот национален регистар сум регистрирана како непожелна личност – објаснува новинарката на „Дневник“.
Во документот напишан на грчки и на српски јазик е наведено дека Костовска се смета за опасност за јавниот ред и безбедност, за внатрешната безбедност, јавното здравје и меѓународните односи на една држава-членка на Европската Унија. Новинарката вели дека е очигледно дека Грција грубо се обидува да ги замолчи македонските новинари и да ги спречи да влезат во земјата.
– Се прашувам дали за грчкото МНР е опасност за јавниот ред и безбедност што пишував дека во Лутраки живеат Македонци. Како би реагирало грчкото МНР кога грчки новинар не би бил пуштен да влезе во Македонија – вели новинарката.
Таа објаснува дека за случајот ќе ги информира меѓународните организации за правата на новинарите.
извор:„Дневник“