Матурантите од гимназиско, средно уметничко и средно стручно образование со четиригодишно траење, од вчера можат да ги проверат резултатите од екстерните испити од државната матура, полагани во јунскиот испитен рок. Резултатите се веќе објавени на веб страницата www.matura.gov.mk, а денес и утре ќе бидат истакнати и на огласните тебли во средните училишта. Оние матуранти кои сметаат дека не се правилно вреднувани ќе имаат право на приговор.
За полагање државна матура беа пријавени 19.052 ученици во 97 јавни и седум приватни средни училишта. Задолжителниот дел на државната матура се спроведе на 9 јуни, а испитот по изборниот предмет беше на 12 јуни. Полагањето го следеа 230 набљудувачи и 2.000 тестатори. За подобро иниформирање на матурантите беше публикуван „Водич за државна матура“ на македонски, албански и турски јазик.
Со цел да биде загарантирана тајноста на испитите, годинава за првпат материјалите се дистрибуираа три часа пред полагањето.
