Нашата армија многу директно ќе се вклучи во борбата со коронавирусот и ќе биде во првите редови како поддршка секаде каде што треба, изјави претпладнево на пресконференција министерката за одбрана Радмила Шеќеринска. Таа посочи дека тоа е овозможено со уредбата што ја донесе владата, со која се овозможува армијата да биде поддршка на државните органи, посебно на полицијата.

Формиран е посебен оперативен штаб на полицијата и армијата, кој ги дефинира попрецизно начините на кој армијата ќе и асистира на полицијата. Армијата целосно ќе ја преземе контролата на границите, на таканаречената зелена линија, со цел да се спречат илегални преминувања, додека граничните премини и натаму ќе ги контролира полицијата. Втора задача на армијата ќе биде учество во заеднички патроли со полицијата кои ќе вршат контрола на почитувањето на полицискиот час и самоизолацијата. Трета задача ќе биде обезбедување на витални објекти од државно значење, како Собранието, Владата и важни локации како што се затворите. – појасни Шеќеринска.

Министерката за одбрана информира дека армиската полска болница ќе биде целосно ставена во функција на јавното здравје и ќе биде лоцирана во непосредна близина на Инфективната клиника.

Битката која ја имаме нема да биде лесна. Одлуките да ангажираме армија не беа лесни, но беа оправдани, затоа што целиот свет се соочува со епидемија и опасност која неможеше да се замисли. – додаде Шеќеринска.

Одговарајќи на новинарско прашање дали има хотелски и други сместувачки капацитети кои се ставаат на располагање за прием на лицата кои треба да одат во самоизолација, рече дека има интерес, како и дека е упатен јавен повик до сите нив и очекува тие позитивно да одговорат.

За жал бројката на тие кои се враќаат во земјата не е мала, но за жал бројот на тие кои не ги почитуваат мерките на самоизолација, исто така, е голем. – додаде Шеќеринска.

Министерката за одбрана појасни дека Главниот штаб работи на потврдување на категориите за кои ќе важат исклучоци за време на полицискиот час, меѓу кои ќе бидат и медиумите. Таа ги коментараше и ингеренциите кои во ситуација на вонредна состојба на владата и овозможуваат да донесува уредби во ранг на закон, истакнувајќи дека тоа не значи дека нема да се врши контрола врз владата и дека тоа и натаму ќе го прават институциите задолжени за тоа како што е антикорупциската комисија и секако медиумите. Таа потврди дека се укинати дел од одредбите кои важат во предизборен период, со кои се забранува вршење јавни набавки и вработувања, за како што рече, да им зе овозможи на соодветните институции непречено да функционираат во услови на криза.

Не очекуваат тешки денови и неопходно беше се што е поврзано со избори да го оставиме ад-акта и се надевам дека се што е политика ќе тргнеме на страна. Во овие моменти не само што не ни требаат ограничувања на државните институциите, треба да бидат посилни. Од нас се очекува да функционира се подобро, а да важат изборните правила. Јас се сеќавам дека многу луѓе ги критикуваа тие правила дека ја парализираат државата и негативно влијаат на економијата во државата, ама 20 или 40 дена секој може да издржи. Влегуваме во криза која што никој не може да предвиди колку ќе трае и неодговорно би било институциите да мислат дека со овој светски предизвик и светска криза ќе може да се справат со врзани нозе. За злоупотреби нема оправдување, меѓутоа секој од нас е одговорен човек и сфаќа дека навистина ѓаволот ја однел шегата меѓутоа ова не се моменти кога треба да зборуваме и трошиме енергија за политика, ова се моменти кога треба да зборуваме за проблемот и да го решаваме проблемот. – рече Шеќеринска.

Г.М.