12:25 Основниот суд во Охрид му изрече мерка притвор до 30 дена на Јосип К. од Куманово, осомничен за убиството на Спаса Бојоска (67) од Охрид, што се случи во понеделникот во станот на жртвата во зграда на ул. „Галичица“.

Против него денеска е поднесена соодветна кривична пријава.

„Поради постоење основи за сомнение за сторено казнено дело „разбојништво“, СВР Охрид поднесе кривична пријава против Ј.К. (37) од Куманово, со привремен престој во стан на улицата „Галичица“ во Охрид. Него, Основното јавно обвинителство му одреди мерка притвор во траење од 30 дена, по што е пренесен во казнено поправна установа-затвор во Скопје.“ – соопшти СВР Охрид.

Според кривичната пријава на 20-ти овој месец во 11 часот и 45 минути, пријавениот, со цел стекнување противправна имотна корист, поѕвонал на станот од неговата соседка, сега починатата Спаса Б. (67) од Охрид. Пријавениот, претходно се осигурал дека таа е сама во станот и подготвувајќи се да го изврши кривичното дело, земал една водоводна цефка и ставил бели хируршки ракавици на рацете.

Објаснувајќи и на соседката дека сака да го погледне распоредот на станот, сега починатата му дозволила влез на Ј.К. и незабележувајќи дека има нараквици и водоводна цефка, од ходникот на станот се упатила кон дневната соба. Тогаш, сега притворениот Ј.К. од зад грб, со водоводната цефка и задал неколку силни удари во пределот на главата и вратот по што таа паднала на подот. Веднаш потоа, Ј.К. започнал да пребарува низ собите, пронашол и одзел еден мобилен телефон и паричник со 3. 200,оо денари во разни апоени.

Пред да го напушти станот, забележувајќи знаци на живот кај соседката и плашејќи се дека ќе биде кажан и откриен, сега притворениот Ј.К. се вратил во кујната и пронашол нож со должина од околу 30 сантиметри со кој и задал неколку удари во пределот на вратот и ја усмртил. Потоа го напуштил станот заклучувајќи го со клучот од влезната врата и се упатил во казино. – објаснува полицијата.

Со цел расчистување на казнено правниот настан, СВР Охрид во координација со Јавниот обвинител, презеде низа мерки за обезбедување траги и доказен материјал, извршен е криминалистичко-технички увид на местото на настанот, извршени се претреси, анкети со граѓани како и други оперативно тактички мерки.“ -информираат од СВР Охрид. 

Осомничениот кој неодамна се доселил во зградата во која живеела и жртвата со која се познавале имал намера од Куманово  да избега надвор од државата, во што бил спречен од полицијата.

За стореното кривично дело согласно законот предвидена е казна од 10 години до доживотен затвор.

Спаса Бојоска вчера беше погребана на градските гробишта во Охрид.

OhridNews