Од 17 март Македонија и Словачка ќе се поврзат со нов директен лет меѓу Охрид и Братислава, информира амбасадата на Словачка во земјава.
Отворањето на директната авио-линија е уште еден чекор напред кон зајакнување на контактите меѓу двете држави без разлика дали се во областа на туризмот, бизнисот или меѓучовечките односи, велат од Амбасадата.
Веруваме дека тоа ќе придонесе за натамошно јакнење на соработката и пријателските односи меѓу Словачка и Северна Македонија, стои во објавата на Амбасадата на социјалните медиуми.
Директната авио-линија, посочуваат, отвора нови можности за туристите од Македонија кои ќе имаат можност да ја посетат Братислава и Словачка, да ги запознаат нејзините историски градови, природата, културата и гастрономијата.
Дополнително, новата авио-линија, велат, ќе им овозможи на посетителите од Словачка да ги откријат убавините на Охрид и неговото уникатно езеро, кое е едно од најзначајните природни и културни богатства во регионот.
Авио-линијата Охрид-Братислава преку авиокомпанијата Визер беше најавена пред околу два месеци на средбата на министерот за транспорт и врски, Александар Николоски и амбасадорката на Словачка, Ивета Хрицова. Николовски тогаш посочи дека истата ќе ги приближи економските врски меѓу двете држави и ќе придонесе за развој на туризмот.
Н.С.Ј.
