Одржана манифестацијата „Чалгиски звуци“ посветена на Климе Садило
15.06.26 11:04
Со звуците на македонската чалгија, емоциите на староградската песна и спомените за еден од најголемите охридски музички амбасадори, во предворјето на црквата „Света Софија“ се одржа манифестацијата „Чалгиски звуци“, посветена на легендарниот охридски виолинист и трубадур Климе Садило.
Годинава манифестацијата се одржа во знакот на два значајни јубилеи – 145 години од раѓањето на Климе Садило и 120 години од постоењето на такамот на Садиловци, симбол на охридската музичка традиција и автентичниот градски мелос. На присутните најпрво им се обрати претседателот на Советот на Општина Охрид, кој истакна дека кога ќе се спомене Охрид, покрај бисерот, езерото и вековните цркви, неизбежно се слуша и звукот на виолината што одекнувала низ калдрмисаните сокачиња, низ охридската чаршија и покрај езерскиот брег. Беше нагласено дека Климе Садило не бил само извонреден виолинист, туку чувар на охридскиот дух, човек кој преку музиката ги раскажувал приказните на градот и неговите жители. Оддавајќи му почит на Климе Садило и на Садиловци, беше истакнато дека се оддава почит и на едно време кога песната ги собирала луѓето околу софрата, кога серенадите се пееле под прозорците и кога секој празник имал свој препознатлив музички печат.
Во име на организаторот, Здружението за уметност и култура „Арт Вивенди“, се обрати академскиот музичар Ѓоко Алоски, кој потенцираше дека „Чалгиски звуци“ претставува повеќе од концертна вечер – тоа е мисија за зачувување на охридската староградска песна и македонската чалгија како непроценливо културно наследство. Тој истакна дека делото на Климе Садило и богатото наследство на Садиловци остануваат трајна инспирација за сите генерации музичари и љубители на традиционалната музика.
Посебен белег на вечерта даде настапот на Универзитетскиот ансамбл „Македонија“ при Универзитетот „Гоце Делчев“ од Штип, под раководство на проф. д-р Владимир Јаневски. Ансамблот пред бројната публика изведе 40-минутна програма составена од бисери на македонската чалгиска музика, потврдувајќи ја својата улога како еден од најзначајните чувари и промотори на македонското музичко наследство. Со особен пиетет беше изведен и специјално подготвениот музички сплет посветен на Садило.
Мирен граѓански протест против фемицидите, родово базираното и семејното насилство е најавен за сабота, 21 ноември, од 12 до 14 часот во Охрид Собирот ќе почне на градскиот плоштад „Св Климент Охри...
Новоопремен фитнес-центар во селото Лешани, наменет за учениците и локалното население, доби Општина Дебрца Опремувањето е реализирано со донација од почесниот конзул на Република Србија во Охрид, ...
СВР Охрид поднесе кривична пријава против правно лице и 67-годишно лице од Кавадарци, сопственик и управител на правното лице, поради постоење основи на сомнение за сторено кривично дело „злоупотре...