Дивоградбите се тема на опозициските партии изминатите два дена. Денеска ВМРО ДПМНЕ на прес конфернција обвини дека проблемот со дивоградбите во Општина Охрид не се решава, а доколку се постапува, тоа е селективно и во дневно политички цели.
Зошто Георгиески броеше секунди за справување со дивоградбите кога сега вели дека општината немала доволно средства самата да се справи? Не постои никакво оправдување во услови кога милиони денари се кратат од капитални инвестиции да не се пренаменат средства за рушење. – истакна Перчо Божиноски од ОК ВМРО ДПМНЕ Охрид.
Тој рече дека е лицемерно да се најавува објавување нов оглас за давање на плажите под концесија, а од друга страна да се бара нивно враќање во првобитна состојба.
Нема решение за управување со отпадот, не се решава проблемот со депонијата во Буково, не е запрено уништувањето на трската, не се заштитува Охридското Езеро, а поради сето тоа останува загрозен статусот на Охрид во УНЕСКО. – додаде Божиноски.
На тема дивоградби, вчера реагираше и партијата Левица, која обвини дека во атарот на Трпејца никнала дивоградба, за која, наводно, локалните жители тврдат дека е на вработен во НП „Галичица“.
Доколку е точно тврдењето на жителите на Трепејца, кој е тој вработен во ,,Националниот парк Галичица”, кој го штити и од каде му е храброста да гради во заштитен појас на НП Галичица? Зошто наместо да ги спроведувате препораките на УНЕСКО за рушење на дивоградбите, вам секојдневно ви никнуваат нови дивоградби? – прашаа од Левица.
OhridNews
