На подрачјето на Охрид од 2006 година до денес не е склучен договор помеѓу Општината и сопствениците на времените објекти за поставување на истите. За сите овие 8 години времените објекти поставени на територијата на Општина Охрид, законски гледано се нелегални објекти и тие мора да бидат отстранети. За целиот овој период нивните сопственици не уплаќале никакви средства на сметката на локалната самоуправа, бидејќи и немале законски основ да го сторат тоа, стои во реакцијата на локалната самоуправа по изнесеното од страна на сопствениците на времените објекти.
– Дел од оние кои поставиле времени објекти, користејќи го безредието кое владееше во општинските служби за време на минатата локална власт, склучувале најразлични апсурдни договори кои се противзаконски со некои од јавните претпријатија за поставување на времени објекти, кои пак во документите се нарекувале на пример- Информативни пунктови за туристи, а на лице место се отворале сендвичари за брза храна, велат од локалната самоуправа.
Оттаму додаваат дека општина Охрид без разлика на критиките кои преку медиумите ги изнесуваат сопствениците на нелегалните објекти, нема да се поколеба во намерата еднаш за секогаш да се стави ред и во оваа област, со цел поубав и подобар Охрид.
OhridNews
