Забелешките што се наведени во Извештајот на УНЕСКО, кој треба да биде разгледан на 43-та сесија на Комитетот за културно наследство што ќе се одржи наредниот месец во Баку, ја покажуваат фактичката состојба на охридскиот регион. Оваа состојба беше детектирана уште во мониторинг мисијата на УНЕСКО која беше направена во април 2017 година, велат од локалната самоуправа во врска со информацијата дека од страна на УНЕСКО– Охридскиот регион да се стави на Листата на загрозено светско наследство.

  • Општина Охрид, во текот на изминатите две години ги зеде предвид сите препораки во однос на ова прашање и во рамки на своите законски надлежности сериозно се посвети на исполнување на барањата на УНЕСКО. Важно е да се напомене дека во рамки на Извештајот освен негативните забелешки, посочени се и сите позитивни активности, на кои нашата локална самоуправа работеше заедно со владините институции, велат од локалната самоуправа.

Додаваат дека во делот на позитивните забалешки, наведени се Одлуката за откажување од Проектот за изградба на Ски центарот на Галичица и Автопатот А3 од Охрид до Св.Наум и започнување на проектот за пренасочување на реката Сатеска во старото корито.

  • Во однос на препораките донесена е и владина одлука за формирање на новото Јавно претпријатие „Колекторски систем“, кое ќе ги преземе обврските за одржување, обновување и продолжување на колекторскиот систем, што е важно во делот на препораките за подобрување на системот за отпадни води. Во тек е постапката за донесување на Планот за управуавње со природното и културното наследство на Охридскиот регион, а во понеделник на 27-ми мај ќе се одржи Информативна сесија за Нацрт-извештајот за Стратегиската оцена на влијанието на животната средина од спроведувањето на овој план. Исто така во владина процедура е и носење на нов Закон за управување со светското природно и културно наследство во Охридскиот регион, стои во соопштението од локалната самоуправа.

Во согласност со ставот на Владата на Република Северна Македонија, Локална самоуправа цени дека препораките од Извештајот на УНЕСКО треба да бидат стимул за сите институции и за граѓаните за да се работи посветено и со поголем интензитет за зачување на нашето уникатно светско природно и културно наследство.

OhridNews