Донесувањето и имплементацијата на Законот за планински патеки има за цел да обезбеди одржливо користење на природно богатство во интерес на сегашните и идните генерации, без значително оштетување на деловите на природата и нарушувања на природната рамнотежа. Ова, вчера, го истакна Министерот за животна средина и просторно планирање, Абдилаким Адеми, на јавната расправа по Предлог на Закон за планински патеки што го изработуваат Министерството за животна средина и просторно планирање во соработка со Министерството за економија, Агенцијата за промоција и поддршка на туризмот во Република Македонија и Федерацијата на планинарски спортови на Македонија.
Според Адеми, со Законот ќе се спречат негативни активности на физички лица и нарушувања во природата како последица на користење на природното богатство.
– Основната цел на Предлог законот е да се утврдат условите и начинот на уредување на планинските патеки, нивното одржување, класификација и категоризација како и други прашања значајни за нивно користење. На тој начин ќе се постигне и поголема заштита на природата и спречување на негативните последици врз биодиверзитетот преку воспоставување на правила за нивно користење ќе се создадат услови за развој и унапредување на планинарскиот туризам во Македонија – истакна министерот Адеми.
Законот за планински патеки е прв пропис во Република Македонија со кој се уредува постапувањето и управувањето со планинарските патеки, чија вкупна должина е проценета на околу 2000 километри, информираат од Министерството за животна средина и просторно планирање.
OhridNews
