По повод честитиките на пратениците Грозданов и Николоски до градскиот совет со реакција се јавија од кабинетот на охридскиот градоначалник. Во реакцијата се вели :
“Без оглед на партиските определби и желби за собирање политички поени кај граѓаните од страна на било кој политички субјект или поединец со партиска провиниенција, па макар и пратеник, недопустиво е и во најмала рака невкусно, одлуката на Советот на општината за подигање споменик на Свети Наум Охридски, да се употребува за дневно-политички маркетинг.
Кабинетот на градоначалникот Александар Петрески, смета за потребно да реагира навремено на таквите обиди чиј сведок е јаноста со божемната јавна благодарност до Советот од страна на пратениците Грозданов и Николоски.Никој, па ни спомнатите охридски пратеници, нема право да „авторизира“ за себе идеја стара деценија и половина, поточно уште од 1992 година. Токму на потребата од плебисцитарен, а не партиски однос кон подигањето на споменикот на Свети Наум Охридски, укажа градоначалникот Петрески на последната седница на Советот.
Во тој контекст, непримерно е двајцата пратеници да ја дезинформираат јавноста со божемната благодарност до нивната Влада и Министерството за култура бидејки носител на сите активности сврзани со споменикот е Одборот формиран од Советот на општината а не Министерството за култура и Владата. Згора на тоа, и во одлуката за подигање на споменикот донесена од Советот на општината стои дека средствата ќе се обезбедат во најголем дел од спонзори и донатори.
Оттука, доколку навистина се сметаат за заслужни и повикани да благодарат некому за нешто, пратениците Цветко Грозданов и Александар Николоски нека го потврдат својот авторитет и вистински ја искажат подготвеноста за реализација на зафатот преку наоѓање средства и спонзори, а не со соопштенија на нивната партија“ – стои во реакцијата.
Кабинет на градоначалник
