Решението за изземање на кривичниот совет стигна и до одбраната на обвинетите во случајот Новаковиќ

Одбраната на обвинетите во случајот со убиството на српскиот турист Дејан Новаковиќ, кој настрада во тепачката што минатиот август се случи во центарот на Охрид, го доби решението за изземање од судскиот процес на Кривичниот совет кој го предводи судијката Милка Танеска. Тоа утрово во телефонски разговор ни го потврди Воислав Димовски, еден од адвокатите на одбраната.Тој рече дека одбраната очекува во најкраток можен рок да се конституира нов кривичен совет и судскиот процес да започне во Основниот суд во Охрид.

Претседателот на Основниот суд Охрид, Владо Дејаноски, на барање на полномошникот на семејството на убиениот српски турист, во понеделникот донесе решение за изземање на Кривичниот совет кој го водеше судскиот процес за убиството на српскиот турист, поради пропусти во постапката. Како што информираат од судот, до крајот на неделата ќе се конституира нов Кривичен совет и судењето ќе почне одново во Основниот суд во Охрид.

За смртта на 34-годишниот белграѓанец се обвинети две лица од Охрид, кои  се товарат за кривично дело свирепо убиство, додека едно лице, исто така од Охрид, е обвинето за помагање по извршено кривично дело. Истовремено за свирепо убиство се товари уште едно лице државјанин на Република Србија, кој засега е недостапен за органите на прогонот.

Судскиот процес за убиството на Дејан Новаковиќ почна на 22-ри февруари без присуство на медиумите, што беше наведено како една од причините за изземање на Кривичниот совет од случајот.