Одиме во Шкотска за да победиме, им порача на островските медиуми македонскиот интернационалец Величе Шумуликоски, фудбалерот на Престон, во пресрет на гостувањето во Глазгов на македонската фудбалска репрезентација против Шкотска.– На Шкотска и треба победа, ама и нам. Мислам дека тоа ќе биде добар отворен меч. Никој не сака реми, затоа што Норвешка игра со Исланд. Ние сакаме да играме фудбал, играме отворено, и затоа одиме во Шкотска за да победиме – изјавил Шумуликоски.
Тој истакнал пред островските медиуми дека Македонија има технички фудбалери, но некој пат на селекцијата и треба многу повеќе од техника.
– Имаме добри техничари, играчи што знаат да играат со топка, но понекогаш ви треба многу повеќе од техника. Мора да се борите за победа. Ние сме мала земја и, ако оствариме добар резултат, сите ќе бидат горди. Ќе направиме сé за да стигнеме до нашата цел и сé додека имаме шанси нема да се откажеме. Ќе се бориме до последната минута – додал Величе.
Тој на Шкотите им посочил дека „суспендираниот“ Бери Фергусон (не игра поради кавга со Џорџ Барли) е најдобриот играч што таа репрезентација го има.
– Одличен играч и најдобар од Шкотска. Ќе ни беше потешко ако тој играше. Тој не настапи на првиот меч и ние победивме, можеби пак ќе победиме – додал Шумуликоски.
