Туризмот, како гранка, не само што носи приход, туку и го промовира македонското природно богатство и културно наследство пред светот, како наша компаративна предност, рече претседателката Гордана Сиљановска-Давкова на средбата со директорката на Агенцијата за промоција и поддршка на туризмот, Билјана Стефаноска.
Во фокусот на средбата беа можностите за интегрирање на туризмот во надворешната политика, преку активна вклученост на македонските дипломатско-конзуларни претставништва, културни институции и дијаспората, како мостови кон нови пазари и туристички потенцијали.
Mала држава како нашата, со исклучителни природни убавини и вредни културно-историски добра има големи и реални шанси да биде посакувана туристичка дестинација не само за време на летните месеци, туку во текот на целата година. Се разбира, останува трајната обврска на министерството за култура и туризам, другите министерства, но и единиците на локалната самоуправа, како и на Агенцијата за промоција и поддршка на туризмот за создавање неопходни претпоставки, посочи Сиљановска-Давкова.
Стефаноска ја информираше претседателката за работата на агенцијата којашто е формирана во 2008 година, со акцент на последните неколку месеци откако е на оваа функција, посочувајќи ги успесите и падовите, актуелните проблеми и предизвици со коишто се соочува.
Потребно да се креира стратегија за развој на туризмот, комплементарна со онаа за културата како гаранција за успех, истакна.
Соговорничките, како што информираат од Кабинетот на Сиљановска-Давкова, се согласиле дека поврзувањето на културата и на туризмот во едно министерство е чекор напред во стратешкиот пристап кон нивниот развој.
Стефаноска на средбата го потенцирала и значењето на културната дипломатија, како и потребата за поддршка при организација на настани во странство со фокус на промоција на македонските природни убавини, традиции, и туристички производи.
Дополнително, како што информираат од Афгенцијата за промоција и поддршка на туризмот, се разговарало и за поттикнување на туризам од дијаспората преку кампањи и соработки со заедниците во странство, креирање на државна туристичка стратегија за дипломатска промоција, како и вклучување на туристичкиот сектор во државни манифестации, културни денови и посети на високи делегации.
OhridNews
