Со целовечерен концерт на Ансамблот „Танец“ и настап на КУД „Ѓердан од бисери“, вчеравечер во Центарот за култура „Григор Прличев“ во Охрид беше отворено 65. јубилејно издание на Балканскиот фестивал на народни песни и игри, една од најзначајните фолклорни манифестации во регионот.
Фестивалот традиционално ги обединува ансамблите од Балканот, кои преку музика, игра и народни носии ја претставуваат богатата културна разноликост и автентичност на своите земји.
На свеченото отворање на фестивалот се обрати претседателот на Советот на Општина Охрид, Перчо Божиновски.
Цели 65 години, Охрид живее со оваа значајна манифестација и преку невидливи, но силни нишки на традицијата, од година во година го зацврстува и го чува она што е највредно, нашата културна меморија, нашето заедништво и нашиот национален идентитет. На почетокот на јули, охридските улици дишат во ритамот на фолклорот. Градот станува сцена на која се среќаваат ора, носии и култури од целиот Балкан. Во овие денови, преку играта и песната, повторно се потсетуваме дека различностите не зближуваат едни со други и не учат на меѓусебно почитување. Овој јубилеј е доказ за континуитет, посветеност и искрена љубов кон традицијата. Тој е доказ дека она што е вистински вредно не избледува со времето, туку се пренесува од генерација на генерација, добивајќи нови значења и нова енергија, рече Божиновски.
Изрази уверување и желба фестивалот да продолжи да биде столб на нашата култура и традиција, симбол на заедништво и почит меѓу народите.
Нека е честит јубилејот на фестивалот и нека продолжат да се испишуваат нови и поуспешни страници на оваа охридска и македонска фолклорна приказна, истакна Божиновски.
Во името на Собранието на Република Македонија свое обраќање имаше пратеничката од Охрид, Грација Бакраческа.
Од Охрид, градот на духовноста, културата и вековната традиција, испративме порака дека песната, играта и фолклорот ги поврзуваат народите, градат пријателства и ги надминуваат сите граници. Нека песната што одекнува овие денови биде песна на пријателството, а ората што ќе се заиграат симбол на единството и заедништвото. Традицијата е нашето најголемо богатство, а културата нашиот најубав амбасадор пред светот, рече Бакраческа.
Во рамки на тридневната фестивалска програма, љубителите на фолклорот ќе може да погледнат настапи на фолклорни ансамбли од Македонија и од неколку балкански земји.
Фестивалот е под покровителство на Собранието на Република Македонија и поддржан од Министерството за култура и туризам и Општина Охрид.
OhridNews
