Поради високите температури се зголемува ризикот од избувнување на пожари на отворени места. Центарот за управување со кризи упатува препорака до граѓаните да внимаваат при посети на отворен простор, во националните паркови и други пошумени или необраснати локации и притоа да не користат запаливи материи, кои можат да предизвикаат пожар од пошироки размери.
Се предупредуваат патниците кои патуваат со автомобилски или железнички превоз, да не фрлаат догорчиња или неизгаснати цигари преку прозорците, за да не се предизвикаат пожари долж патните комуникации. Се замолуваат сите лица кои во периодот на зголемени надворешни температури мораат да спроведуваат работни активности во пошумени или други локации, да ги зголемат мерките на претпазливост за да не дојде до опожарување на околината.
Граѓаните, доколку забележат одредени сомнителни места на кои е присутен оган или чад треба веднаш да ги известат надлежните служби во најблиските институции и установи или да се јават на телефонскиот број 195, како бесплатен број за итни повици на Центарот за управување со кризи. Од ЦУК апелираат до населението овој број да не се злоупотребува за лажни повици, кои би предизвикале несакани последици по мирот, спокојството и безбедноста на граѓаните. Во спротивно, за прекршителите ќе бидат преземени соодветни мерки.
