Работодавачите, односно, директорите на охридските училишта и другите надлежни установи да им врачат решенија за работа на неодредено време на сите кои го исполнуваат тој услов, бара Регионалниот одбор на СОНК – Охрид. Во Охрид тоа не е направено само во уште еден случај со вработен во основно училиште на кој и покрај тоа што има работен стаж од 9 години, се уште не му врачено решение за постојан работен однос, било истакнато на состанокот на претседателите на основните синдикални организации од градот, одржан деновиве. СОНК Охрид ги предупреди надлежните во случајот, дека согласно Законот,следуваат високи парични казни како за училиштето/установата, така и за раководното лице/директорот, доколку не се регулира работниот однос на вработените со договор на дело со стаж поголем од 5 години.
СОНК најави дека до Нова Година, ќе побара од Владата и Министерството за образование, да се регулира работниот однос на вработените на сигурни испразнети работни места, за да се избегнат притисоците кои, како што велат од синдикатот, се случуваат пред секои нови избори.
На состанокот станало збор и за екстерното оценување на наставниците кое е во тек и кое СОНК очекува да биде извршено непристрасно. Покрај актуелните состојби охридските синдикалци ја разгледале и информацијата за внатрешните избори во СОНК што ќе се спроведат во 2010 година.
Ohridnews
