Нема поважна мисија од тоа Охрид да го направиме општина за сите граѓани. Првиот чекор е создавање на инфраструктура за сите. Градиме одговорно, квалитетно и домаќински, за секој граѓанин да добие решение кое ќе му го подобри животот во неговата средина. Ова го истакна кандидатот за градоначалник од СДСМ Јован Стојаноски на завршната прес конференција што се одржа денеска на градскиот плоштад.
„Нема ништо поважно од здравјето на луѓето. Затоа наш приоритет е обезбедување на чиста и здрава вода за пиење и чист воздух. Се обврзавме постојано и навремено да ги чистиме депониите и каналите, да вложуваме во колекторски системи, пречистителни станици, регионални фабрики за третман на отпад и енергетски ефикасни објекти. Парите ги враќаме кај граѓаните. Соработуваме со бизнисите, заедно ги креираме плановите за поефикасен локален економски развој. Преку соработка со фирмите, обезбедуваме сигурна пракса за младите, ги насочуваме во професионалните кариери. Создаваме отворена и услужна, општина за сите. Обезбедуваме пријатни детски градинки, чисти и загреани училишта. Обезбедуваме поддршка и помош за најзагрозените семејства и за лицата со посебни потреби. Ги вклучуваме граѓаните во креирањето на буџетот, во носењето одлуки и во контролата на власта.“ – рече Стојаноски.
Кандидатот за градоначалник на Охрид на СДСМ упати заврпна порака до гласачите пред неделните локални избори:
„Мои охриѓани,
Во недела стоите пред најважниот избор од кој зависи иднината на Охрид, и вашата иднина. Ве повикувам, храбро, достоинствено и одлучно, сите заедно, да излеземе и да го дадеме својот глас за подобар Охрид. Охрид го заслужува тоа, вие го заслужувате тоа. Охрид не може и не смее повеќе да биде заложник и да тапка во место. Со заокружување на бројот деветнаесет, вие ја имате моќта да изберете живот во Охрид за сите. Одлуката е лесна. Придружете ни се. Јас, вие, сите заедно, во недела да му ја вратиме слободата на Охрид. Заедно да донесеме живот во Охрид за сите.“ – порача Стојаноски.
OhridNews
