Љубаништа и струшко Калишта се меѓу туристичките развојни зони на кои од идната година се предвидува да почне изградба на нови хотели, ресторани, кафулиња, плажи. Како што пишува „Дневник“, каде и како ќе се гради, ќе предложат странски консултанти, односно хрватската компанија „Хорват и Хорват консалтинг“ со која Министерството за транспорт и врски склучила договор за изработка на мастер-план за развој, вреден 170.000 евра.
Според договорот, компанијата до крајот на првата половина од следната година треба да достави детална анализа, план и конкретни предлози за развој на туристичките зони во земјава. По добивањето на предлозите, ќе се склучуваат договори со заинтересираните инвеститори.
Секоја од планираните туристички зони ќе се простира на површина од околу 10 хектари, а право да градат капацитети ќе имаат домашни и странски инвеститори. Колку објекти ќе се градат ќе зависи од интересот на инвеститорите. Според најавите на Владата, најголемиот дел од земјиштата во зоните е државно, така што се очекува дека нема да има административни пречки за брз почеток на градбата. Мал дел од земјиштето кое е во приватна сопственост, ќе биде експроприрано.
Домашните и странските инвеститори што ќе градат во туристичките развојни зони ќе бидат ослободени од персонален данок на доход и од ДДВ за градежни материјали во следните 10 години. Во исто време, ќе добијат и државна помош за секоја инвестиција од над 10 милиони евра, како и помош за обука и усовршување на вработените.
OhridNews
извор Дневник
