Судскиот процес за убиството на српскиот турист Дејан Новаковиќ што минатата година се случи во центарот на Охрид ќе се води пред Основниот суд во Прилеп , потврди денеска надлежниот Апелациски суд во Битола.

Како што информираат од Апелација, процесот што почна пред Основниот суд во Охрид на 22 февруари ќе биде повторен од почеток, независно што досега се одржани две рочишта на кои исказ дадоа обвинетите охриѓани и дел од сведоците.

Претседателот на Основниот суд Охрид, Владо Дејаноски, на барање на полномошникот на семејството на убиениот српски турист, во понеделникот донесе решение за изземање на Кривичниот совет кој го водеше судскиот процес за убиството на српскиот турист, поради пропусти во постапката. По изјаснувањето на судиите од Основниот суд во Охрид за изземање од предметот, Апелација одлучи судскиот проcес да почне од ново во Основниот суд во Прилеп.

За смртта на 34-годишниот белграѓанец се обвинети две лица од Охрид, кои  се товарат за кривично дело свирепо убиство, додека едно лице, исто така од Охрид, е обвинето за помагање по извршено кривично дело. Истовремено за свирепо убиство се товари уште едно лице државјанин на Република Србија, кој сеуште е недостапен за органите на прогонот.

OhridNews