Со цел зголемување на безбедноста за време на Велигденските и првомајските празници во Охрид но и остварување поблизок контакт со граѓаните, СВР Охрид во своето редовно полициско работење, од денеска ја ангажира велосипедската полициска патрола.
Предвидено е, патролата, активно да се вклучи во превентивното и репресивното полициско делување во централното градско подрачје, плажите, паркинг просторите но и во останатите делови од градот. Полициските службеници на велосипед, ќе работат на спречување на вршење кривични дела и прекршоци, откривање на сторители на казнени дела, ќе преземаат мерки за одржување на јавниот ред и мир и мерки во сообраќајот. – информира портпаролот на СВР Охрид Стефан Димовски.
На иницијатива на Канцеларијата за односи со јавноста, СВР Охрид ја воведе велосипедската полициска патрола во јули 2008 година, по претходна професионална обука.
За велигденските и првомајските празници, во услови кога во Охрид и Струга очекувано има зголемена фреквенција на сообраќај, СВР Охрид во функција ја стави и Полициската мото патрола. Освен за безбедноста во сообраќајот, таа ќе се грижи и за целосно спроведување на безбедносните протоколи за заштита на јавното здравје и на граѓаните од вирусот Ковид 19.
OhridNews
