Одлуката на Советот на општина Охрид, за специфично пребојадисување на такси – возилата во градот наиде на отпор кај многу таксисти и откри доста работи криени „под тепих“.

Имено оваа одлука е донесена на седница пред повеќе од една година, а треба да стапи во сила на први април 2007. Сите такси возила треба да бидат бојадисани во сино – бела комбинација (сини хауба и задна врата – гепек, а остатокот бела боја). Со ова такси возилата би добиле специфика, би се двоеле од приватните возила, полесно би биле забележани од патниците, дури во извесна смисла ќе добијат на „дигнитет“. Фино. Тогаш зошто толку големо несложување со одлуката?!


„80% од таксистите во Охрид се противат на одлуката за пребојадисување на возилата,“ вели Менде Стојаноски (слика горе) од компанијата „Моби Дик“. „Ова е волја на поединци, конкретно Иво Тасески и Сашо Донески, сопственици на такси – компании кои наметнаа мислење и кај Зоран Шикалоски од секторот за сообраќај. Не е дојдено до фарбањето, проблемите на таксистите се многу побројни и поголеми. Инспекциските служби прво треба да се справат со нелегалните таксисти кои ни го земаат лебот на нечесен начин. Ние плаќаме давачки, тие не,“ додава тој.

За да може да се обавува такси дејност, потребна е лиценца која содржи бројни правила и обврски што треба сопственикот да ги исполни. Нпр. погодност на возилото за такси, мора да е со 4 врати, потоа обврска за вонреден технички преглед секои шест месеци, возилото мора да гласи на фирма, возачот да е осигурен и да има лекарско уверение итн.

„Плаќаме најскапи лиценци во Македонија (40.000 денари за 4 години). Па во Скопје е 6000 денари годишно. Едно лекарско уверение чини 1.700 денари и условени сме да го бараме само во медицински центар – Охрид. Во Струга е 600 денари, ама не важи за Охрид. Сега уште ни ја наметнуваат обврската за пребојадисување, додатен, не мал трошок. Имаме само обврски, а никаква заштита. Кога јас ја добив лиценцата немаше објаснување дека ќе имам обврска да ја менувам бојата на колата,“ објаснува Валентин Толевски, таксист. „Секоја нова лиценца отсега нека ја носи обврската за специјални бои. Вака како што е сега, се добива впечаток дека некои сакаат намерно да ги кренат трошоците на работа за многу таксисти да се откажат и работа да „остане“ само за поединци со врски кај авторитетите.“ вели Толевски.

Како и дали одлуката за пребојадисување ќе се спроведува, објаснува началникот за сообраќај, Зоран Шикалоски:

„Одлуката е донесена пред повеќе од една година на предлог и со согласност на 9 (девет) најголеми такси –компании, со најмногу возила. Нa нивен предлог даден е временски рок за нејзино спроведување, до први април 2007. Ова е само еден од начините за борба против нелојалната конкуренција, односно „дивите“.

Од пред неколку дена  испратени се писма до сите такси компании за да се усогласат барањата од одлуката до први април. Освен бојата, таксистите ќе мора да имаат баждарен таксиметар, возењето ќе почнува со заштитна цена од 30 денари до еден километар, а секој нареден ќе чини 25 денари.“ вели Шикалоски. „Непочитување на пропишаните правила може да доведе до одземање на лиценцата. Одлуката може да ја смени само тој што ја донесе – Советот“ додава тој.


Направивме мало „тест – возење“, поточно две, и се уверивме во нееднаквоста (ајде на боите, тоа се гледа од авион) туку што е поважно и на цените. Кај еден превозник почетната цена беше 30 денари, а само половина час подоцна кај друг „стартот“ беше 10 денари.

Текст и фото:
С. Костоски