На 29 мај, петок, со почеток во 20:00 часот, во НУ Библиотека „Григор Прличев” – Охрид ќе биде изведена театарската претстава „Марта“ наменета за публика над 12 години.

Претставата „Марта” е работена според делото „Марта пред огледалото“ и претставува интимен театарски запис односно покана за влез во дневникот на една млада тинејџерка која се соочува со анорексија. Преку нејзината перспектива, публиката сведочи на тивката, но длабока внатрешна борба што често останува невидлива за околината.

Делото е збогатено со монолози и искуства на самите актери, што дополнително ја продлабочува емоционалната димензија на приказната и ја прави поавтентична и блиска до публиката.

Претставата не е само приказна, таа е протест и повик за будење. Таа алармира за важноста од навремена реакција, разбирање и поддршка, како за оние кои се соочуваат со оваа состојба, така и за нивните блиски.

Автор на текстот е Тереса Кало Фонтан, а режијата и драмтизација, Маја Ѓурчевска.

Во претставата играат: Нина Неделковска, Зорица Станковска, Петар Мароски, Магдалена Пејова, Ана Шапкарова и Марија Димитрова.

Влезниците се по цена од 250 денари.

Претставата на 30 мај со почеток во 20:00 часот ќе биде изведена и во Центар за култура „Браќа Миладиновци – Струга.

OhridNews