На програмата на годинешното 66. издание на Фестивалот „Охридско лето“ вечерва е премиерната изведба на прeтставата „Татко“ од Флоријан Зелер, во продукција на „Театарот на еден актер“ од Скопје.

Продукцијата „Театарот на еден актер“ – Скопје, како продолжение на продукцијата „Театар и филм – БМ“, основана во 2001 година од Бајруш Мјаку, има реализирано претстави со висок уметнички квалитет, како што се: „Дневникот на лудиот“ од Гогољ, „Таткото“ од Стриндберг, „Вујко Вања“ од А. П. Чехов и ТВ филм „Татковите книги“ од Л. Старова. Во копродукција со Националниот театар Приштина, Албанскиот театар – Скопје и „Ibsen Award“ од Скиен, Норвешка, се реализираа: мегапроектот „Пер Гинт“ од Х. Ибзен, „Сократовата одбрана“ од Платон, „Народен непријател“ од Х. Ибзен и „Се бара стар кловн“ од М. Вишњек.

Основачот на оваа продукција, Бајруш Мјаку, заедно со режисерот Иван Поповски, со избран актерски тим и импресивна сценографија, го реализираат текстот „Таткото“ од Флоријан Зелер. Во претставата играат Андре – Бајруш Мјаку, Ана – Амернис Нокшиќ, Пиер – Фисник Зеќири, Една жена – Сабина Мемиши Асланај, Лаура – Мелика Кастрати и Еден маж – Флакрон Алији. Сценограф е Енес Деари, а костимограф Изет Цури.

Со ликот на Таткото, Мјаку ќе ја заокружи својата блескава 53-годишна театарска кариера.

Одлуката да го реализирам овој проект, односно да ја заокружам мојата 53-годишна уметничка кариера, беше болна – исто толку колку и ликот на Таткото во драмата „Таткото“ од Флоријан Зелер, кој во поодмината возраст боледува од болеста на заборавањето – Алцхајмер. Покрај исклучителната театарска вредност на текстот, сметам дека со овој материјал отвораме едно мошне актуелно прашање што го зафаќа целиот свет и сè повеќе ни се приближува – Алцхајмеровата болест, вели Мјаку.

Иван Поповски е македонски режисер со руска „школа“, кој живее и работи во Москва повеќе од две децении. Како еден од основачите, Иван Поповски е и еден од главните режисери на театарот од неговото основање, па до денес. Во 2007 година претседателот на Република Македонија го одликува Иван Поповски со почесната титула Амбасадор на културата на Република Македонија во Руската Федерација. Во 2008 година рускиот претседател Дмитриј Медведев потпиша указ со кој Поповски се наградува со медалот „Пушкин“ за значаен придонес во зајакнувањето на руско-македонските односи и популаризацијата на руската култура и јазик.

Претставата „Татко“ е во времетраење од 1 час и 30 минути и е наменета за сите возрасти. Истата ќе биде изведена во НУ Центар за култура „Григор Прличев“ со почеток во 21 часот. Цена на билетот е 300 денари.

OhridNews