Како што истакна првиот човек на дирекцијата, Шабан Салиу, во оваа фаза од акцијата од дното на езерото биле извадени над 8, 6 тони неексплодирани средства. – Акцијата ја оценувам како успешна, и се надевам дека доколку продолжи поддршката од донаторите, таа ќе продолжи и во месец септември со расчистување на струшкиот дел од езерото, рече Салиу.
Акцијата, чија прва фаза се реализира минатата година, се изведува со финансиска поддршка на американската Влада и Меѓународната фондација за заштита од мини „ИТФ“ од Словенија.
– Оваа акција е од особено значење за Охрид и Охридското езеро како светско природно наследство, заштитено од УНЕСКО. Неексплодирани убојни средства сеуште има на одредени локации, но се надевам дека донаторите ќе имаат слух и понатаму и дека ќе помогнат во расчистување и на останатите локации, истакна заменик директорот на Меѓународната фондација за заштита од мини “ИТФ”, Горан Гачник.
При извлекувањето на средствата беше користена специјална опрема за подводно детектирање и извлекување на опасниот материјал. Опремата која беше користена минатата година, во втората фаза од акцијата беше надополнета и со два подводни детектори и мамут пумпа за поефикасно лоцирање и вадење на неексплодираните убојни средства.
Во првата фаза од акцијата, која започна минатата година, од Охридското Езеро беа извадени 7.3 тони неексплодирани убојни средства, што датираат од периодот на Балканските и двете светски војни. Опасниот материјал беше уништен на воениот полигон „Криволак“.
