Агенцијата за промоција и поддршка на туризмот, денеска, во Трпејца ќе снима материјал за пропаганден плакат инспирарн од вечерната променада, која се одржува во рамки на културната манифестација „На зајдисонце“.
-Се надевам дека тоа ќе биде уште еден поттик во морето интересни содржини кои ги прави не само Трпејца туку и другите туристички дестинации ние со нешто да се издвоиме и да направиме бренд. Бренд за Трпејца е зајдисонцето и белите камчиња и се надевам дека тоа ќе биде нашата приказна која во годините што доаѓаат ќе треба да ја развиваме и да ја нудиме на туристичкиот пазар.-изјави Милчо Јованоски, организатор на манифестацијата „На зајдисонце“.
Вечерна променада во Трпејца покрај оваа вечер, ќе има и во петок. На Охридското Езсро, помеѓу двата моста во Трпејца во чамци осветлени со факели и фенерчиња, ученици од ОМУ „Методи Патче“ од Охрид ќе изведуваат класични дела и преработки на стари македонски песни.
-Тоа ќе биде посебно доживување за луѓето кои ќе бидат присутни и кои ќе можат од рестораните на брегот да уживаат во прекрасна глетка и во музиката.-додаде Јованоски.
Манифестацијата „На зајдисонце“ во Трпејца се одржува по трет пат под покровителство на општина Охрид. Во рамки на манифестацијата се организираат хуманитарни работилници за изработка на бисерни камчиња и оригами, школа за пливање, кајакарска регата, шаховска школа и курсеви по Англиски јазик. Сите случувања „На зајдисонце“ се бесплатни.
Г.М.
