Фестивалот „Вдиши театар“ вечерва ја спушта завесата со претставата „Жени се, сине!“ на Црвен крст Суботица, која ќе се изведе во предворјето на црквата „Света Софија“ во 20:30 часот.

Низ смеа и препознатливи животни ситуации, претставата ја следи потрагата по среќа во свет оптоварен со долгови, потрошувачки навики и наметнати трендови. На духовит начин се критикува современото потрошувачко општество, каде осаменоста и проблемите често се прикриваат зад лажен сјај. Влезот е слободен, а пораката е едноставна, но силна: да се вратиме кон автентичноста, чесната работа и прифаќањето на другите такви какви што се, велат од Црвен крст Охрид.

Третата фестивалска вечер донесе две сосема различни, но подеднакво впечатливи театарски остварувања од Србија, кои публиката ја поведоа низ емотивни и комични светови исполнети со силни пораки.

Најпрво во НУЦК „Григор Прличев“ настапи театарската група на Црвен крст Крагуевац со претставата „Трибина, куфер, бабушка и поет“, составена од четири животни приказни што зборуваат за стравовите, надежите, загубите, желбите и внатрешните борби кои секој човек ги носи во себе. Преку ликот на поетот, куферите исполнети со спомени, девојката која никогаш не ја почувствувала мајчината прегратка и младата кошаркарка чиј сон е прекинат од повреда, претставата ја отвори темата за животот во неговата најискрена форма. Со одличен текст, впечатлива атмосфера и сценско движење надополнето со снимени гласови, актерите создадоа емотивно патување кое потсети дека човекот вистински живее сè додека умее да се восхитува, да сака и да се надева.

Втората претстава на вечерта, „Берачи“ на Црвен крст Ужице, донесе сосема поинаква енергија. Станува збор за духовита и оригинална „драма во драма“, во која еден актер, долго време без ангажман, бара текст од својот пријател писател за повторно да застане на сцена. Нивното пријателство, исполнето со искреност, недоразбирања и комични ситуации, се развива паралелно со приказната од драмата што ја играат, за неколку парови кои одгледуваат малини во година обележана со суша и мраз. Преку судирот меѓу уметноста и секојдневниот живот, претставата отвора прашања за пријателството, љубовта, амбициите и местото на театарот во современото општество. Со многу хумор и неочекувани пресврти, „Берачи“ ја освои публиката и предизвика искрени реакции и смеа.

Со вечерашната претстава „Жени се, сине!“ ќе биде затворено овогодинешното издание на фестивалот „Вдиши театар“, кој и оваа година покажа дека театарот е простор каде се среќаваат различните приказни, а човечноста секогаш останува во центарот на сцената.

OhridNews