– Новата Влада на СДСМ ќе го ресетира спортот во Македонија. Ќе го зголеми бројот на активни спортисти во државата, нема да троши пари на експерименти од типот: игралишта за хохеј и скијачки скокалници, а паралелно со тоа понижување на врвните спортови. Финансиските средства за спортот ќе се зголемат за десет пати повеќе од досегашното ниво, a Агенцијата за млади и спорт нема повеќе да биде “Градежна фирма“, туку мотор за промоција на врвниот и масовниот спорт, рече Велјаноски.
Тој, меѓу другото, кажа дека приоритет на новата Влада ќе биде и обезбедување статус на дејноста спорт и на спортистите, стабилни извори на финансирање на спортот од централниот и локалниот буџет и можност за директна поддршка на спортот со средства од стопанството.
– Ќе го укинеме Јавното претпријатие за спортски објекти и ќе ги поделиме објектите помеѓу локалната и централната власт, ќе градиме нови современи објекти за спорт, со поставување на вистински модел на училиштен и студентски спорт ќе го зголемиме бројот на ученици и студенти коишто спортуваат, ќе ги подобриме условите за спортување на учениците, студентите и лицата со посебни потреби, почнувајќи од обезбедување пристап до објектите со 24- часовно користење. Процентот на граѓани кои спортуваат ќе го зголемиме од денешните 2% на 20% од населението, нагласи Велјаноски.
