Со поддршка на современи AI алатки за структурирање и продукција на наративната содржина, како и со голема желба и посветеност за зачувување и оживување на културното наследство, Драган Кумев (Kumev Brothers Production) и Михајло Филев, го изработија документарниот филм „Охридски бисер-семејство Филеви 1928“.
Преку овој документарен филм, целосно изработен со помош на современи алатки за вештачка интелигенција, нашата цел е да ја оживееме и претставиме историјата на Охридскиот бисер. Филмот ја истакнува неговата длабока поврзаност со кралските семејства и истакнатите личности кои низ историјата го добивале како подарок, со што Охридскиот бисер станува симбол на престиж, културна вредност и меѓународно признание, посочуваат.
Преку оваа приказна, велат, Охрид и Македонија се промовираат како автентичен центар на култура, традиција и врвно занаетчиство, чија вредност надминува генерации и граници.
Охридскиот бисер, како еден од најпрепознатливите симболи на Охрид, претставува уникатно културно наследство кое од 1928 година се чува и негува од семејството Филеви. Тајната формула за неговата изработка, првично доверена од Јован Субанович на Никола Филев, претставува ретко занаетчиско знаење кое се пренесува од генерација на генерација. Овој бисер, изработен рачно и премачкан со традиционална емулзија од лушпите на ендемската охридска риба плашица, се издвојува по својот природен сјај, длабочина и уникатна естетика, раскажуваат.
Во текот на историјата, исткнуваат, Охридскиот бисер бил подаруван на членови на кралски семејства, дипломати и високи државници, со што станал симбол на престиж, културна вредност и меѓународно признание.
Присуството на бисерот во кралските дворови претставува значајна потврда за неговата автентичност и за вредноста на македонската традиција. Преку претставување на овие историски врски со кралските семејства, се отвора можност за уште посилна промоција на Охрид и Македонија како земја со богато културно наследство и уникатни занаети кои се препознаваат и ценат на светско ниво, додаваат.
Денес, семејството Филеви продолжува да ја чува оваа жива традиција, спојувајќи ја автентичната изработка со современ пристап, со цел приказната за Охридскиот бисер да продолжи да се пренесува и да инспирира нови генерации.
OhridNews
