Повторно денес бевме сведоци на уште една бесцелна прес конференција на СДСМ Охрид, на која од оваа партија повторно се обидуваат безуспешно да ја замајуваат јавноста со некои лажни тези и тврдења во кои никој не верува па ни тие самите, се наведува во реакцијата на ОК ВМРО-ДПМНЕ Охрид, по повод денешната прес-конференција на ОО СДСМ Охрид.
„Од изнесеното на прес конференцијата може да се заклучи дека СДСМ погрешно ги толкува односите на нашата држава со УНЕСКО. Најверојатно не знаејќи како функционира тој однос кој всушност е однос на партнерство и со мисијата на УНЕСКО отворено се разговара за сите планови, актуелни зафати и идни програми кои ќе ги реализира нашата држава. Токму од овој партнерски однос произлегоа и заклучоците кои не се никакви критики, ултиматуми или закани како што бесцелно се обидува во јавноста да ги прикаже токму СДСМ , туку се заеднички насоки на дејствување во интерес на заштитата на културното и природното наследство на Охрид.“ – стои во реакцијата.
Оттаму велат дека партнерството меѓу Република Македонија и УНЕСКО обезбедува значајни ефекти во заштитата на културното наследство и природата и тоа ќе продолжи и во иднина.
„Успешната соработка со УНЕСКО е видлива за сите граѓани на Охрид и Македонија и тие точно знаат дека нема и немало никаков простор за загриженост , успешните проекти на Владата кои станаа секојдневие во стариот дел на Охрид ќе продолжат без разлика дали некој бесцелно тоа ќе го критикува.“ – велат од ОК ВМРО-ДПМНЕ Охрид.
OhridNews
