Во пораст бројот на заболени од рак на дојка во Македонија

Според податоците на здружението „Животна искра“ во Македонија се зголемува бројот на нови заболени од рак на дојката. Ако до пред десетина години бројот на жените со дијагностициран карцином на дојката во Македонија изнесувал 100-ина, сегашната бројка е околу 700 нови случаи годишно.

Според официјалните податоци, инциденцата на канцер на дојката во Македонија е 61 случаи на 100 илјади жители годишно, додека морталитетот е околу 25 случаи на 100.000. Најмладата жена оперирана од рак на дојката во Македонија е на 19-годишна возраст.

Месец октомври е месецот за борба против ракот на дојката и експертите апелираат дека раното откривање на ракот е од клучно значење во борбата против болеста.

Под мотото „Заедно е возможно“ Светската здравствена организација оваа година стави посебен акцент на скринингот како ефикасен начин за рано откривање на малигните заболувања.

Пушењето е најчест причинител на појавата на рак. Останатите ризични фактори за појава на рак се алкохолот, физичката неактивност и дебелината, слаба консумација на зеленчук и овошје, загадувањето на животна средина.

Во Македонија луѓето најмногу умираат од кардиоваскуларните заболувања, додека малигните заболувања се втора причина за смртност на населението.