Во дел од завеаните села помош се носеше по воздушен пат, но во некои од нив и покрај апелите за помош од страна на жителите, хеликоптерите не можеа да им помогнат. Таков случај беше и со струшкото село Модрич, каде на апел на жителите за помош во лекови, одговори Единицата за спасување во планина и непристапни терени која функционира во рамки на општинскиот Црвен крст.
– Бевме повикани од Центарот за управување со кризи, по што се упативме кон Модрич. Движејќи се со специјални скии успеавме да стигнеме до селото каде имаше снежни наноси и до два метри. Ги предадовме потребните лекови и веднаш трганавме назад, објсанува алпинистот Антонио Додевски, член на Единицата за спасување во планина.
Единицата функционира веќе седум години и е составена од алпинисти и планинари, специјално обучени за изведување на вакви акции. Освен во Охрид, ваква единица има и во Скопје.
– Проблем е што и покрај неопходноста од функционирањето на вакви единици , сеуште од страна на државата нивното работење не е законски регулирано и институционализирано. Засега користиме сопствена и опрема од Црвениот крст. Но, кога таа ќе се расипе принудени сме сами да ја купуваме, а истовремено никој не гарантира за нашите животи доколку тие се изложени на опасност при ваквите интервенции, вели Додевски.
Сериозноста на ситуациите наметнува неопходност од поголема и беспрекорна организација, при која точно ќе се знае каде и кога треба да се интервенира, за колку лица и по чиј налог.
Додевски информира дека општинскиот Црвен крст заедно со организацијата на ниво на Македонија прави напори, конечно ваквите единици да се стават во еден систем и да се формира служба која ќе ги покрива потребите низ цела Македонија.