Партијата Достоинство со помош на своите контакти со врвни македонски бизнисмени и странски компании ќе се обиде Охрид да го направи вистински туристички град, во кој ќе се отстранат сите пречки кои тоа не го дозволуваат. Најважно е да се спроведе ред, затоа што е очигледно дека полицијата не ја врши својата функција, истакна при денешната посета на Охрид лидерот на Достоинство, Стојанчо Ангелов, кој во чест на просветителите Кирил и Методиј, се поклони пред нивниот споменик во градскиот парк.


Во врска со досегашниот тек на предизборната кампања, Ангелов истакна дека минува во напната атмосфера, проследена со бројни притисоци, додека најголемите политички партии фрлаат огромни средства и прават патувачки циркус, при што едни исти луѓе ги носат на митинзите во сите градови. 

Претседателот на Дoстоинство истакна дека нивна заложба е партијата на претстојните избори да освои девет пратенички места.

– Свесни сме дека тоа е тешко, но гледаме дека кај граѓаните постои голем револт кон СДСМ и ВМРО- ДПМНЕ. Ние сме нова, чесна, искрена и бескомпромисна сила која се докажа дека знае да ја сочува својата чест. Веруваме дека граѓаните тоа ќе го препознаат и ќе ни ја дадат својата доверба, рече Ангелов.

Тој потенцира дека Достоинство нема да биде дел од политичка  коалиција по секоја цена. – Подобро е да не бидеме дел од коалиција отколку да ги погазиме нашите принципи. Еден од нив е департизација на општеството. Денес државата е целосно партизирана и таквата практика треба да престане.-истакна Ангелов. 

OhridNews