По повод празникот Пренос на моштите на Светиот првомаченик и архиѓакон Стефан, во манастирот „Св. Стефан“ крај Охрид денеска и утре ќе се одржат богослужби и заедничка молитва со верниците.

Празнувањето започнува денеска, 14 август, во 19 часот, со вечерна богослужба. Утре, 15 август, утрената богослужба ќе започне во 7:30 часот, а Светата литургија во 8:15 часот.

Од манастирот ги покануваат верниците да присуствуваат на богослужбите и заеднички да го одбележат празникот посветен на Свети Стефан.

Манастирот „Св. Стефан“ се наоѓа на околу пет километри од Охрид, покрај старата пештерна црква посветена на првиот христијански маченик – архиѓаконот Стефан.

Пештерната црква датира од IX век и претставува редок сакрален споменик. За нејзиното оформување е искористена природна пештера, која од јужната страна е преградена со ѕид од кршен камен, а во подоцнежниот период покрај неа биле изградени и манастирски конаци.

Еден од највпечатливите и препознатливи детали во пештерната црква е „Божјото око“, редок симбол по кој оваа древна светиња е особено препознатлива.

OhridNews