Од денес до 12-ти ноември во Младинскиот центар во Охрид ќе се одржи Националниот форум за младинска работа.
Форумот, како што информираат од Коалицијата на младински организации СЕГА, претставува национална платформа за размена на искуства, идеи и добри практики помеѓу младински организации, институции, општини и останати чинители кои работат во областа на младинските политики и младинската работа.
Во текот на настанот ќе се реализираат панел-дискусии, работилници, презентации и интерактивни сесии насочени кон унапредување на младинската работа и зајакнување на меѓусекторската соработка, посочуваат.
Официјалното отворање на Форумот е утре, 11 ноември, од 10 до 10:45 часот, со поздравни обраќања на претставници на релевантни институции и организации. Меѓу нив се Никола Додов од Министерството за социјална политика, демографија и млади, Ана Чернишова, заменичка на постојаниот претставник на Програмата за развој на Обединетите нации (УНДП) во Северна Македонија, Биљана Цветановска Гугоска, шефица на канцеларијата на УНФПА во земјава, и Ана Михајлов, директорка на Националната агенција за европски образовни програми и мобилност.
На отворањето, според најавата, ќе се обратат и градоначалникот на Охрид, Кирил Пецаков, како и Зоран Илиески, извршен директор на Коалицијата на младински организации СЕГА.
Во рамки на Форумот ќе се одржи и свечено доделување на националната награда „Младински пријателски град“, со која ќе бидат наградени осум општини, по една од секој плански регион, за постигнатиот напредок во спроведувањето на обврските и стандардите предвидени со Законот за младинско учество и младински политики.
OhridNews
