Години наназад невработеност се провлекува како клучен економски и социјален проблем во Македонија. Мојата генерација е под влијание на пазарот на трудот, но не на вистинскиот, туку пазарот на трудот кој го креираат двете ‘најголеми фирми” во Охрид- Локалната самоуправа и јавните претпријатија кои се под СДСМ и од друга страна подрачните одделенија на министерствата на владеачката ВМРО- ДПМНЕ, рече на денешната прес конференција, секретарот на ЛДП- Охрид, Дејан Блажески, кој потенцира дека сега за работа не е предуслов стручноста, туку членска книшка. 


– Како човек кој доаѓа од приватниот сектор одговорно тврдам дека истиот се наоѓа во незавидна состојба поради лоша бизнис клима и лошите услови за стопанисување, како и недефинирани правила на игри. Либерално демократската партија става силен акцент на малите и средни претпријатија, преку зголемување на буџетската подршка. Ќе се залага за нулта стапка данок на добивка, со што 270 милиони евра ќе останат во економијата. Нулта стапка на данок на добивка, укинување на дискриминаторскиот данок на вкупен приход за микро претпријатијата, намалување на нулта толеранција за неплаќањето на обврските на владата, отварањето на нови работни места, зајакнување на економијата и спречување на одлив на мозоци, се само дел од реално спроведливите мерки за кои се залага ЛДП, рече Блажески.

OhridNews