Првачињата од сите основни училишта од Охрид и Дебрца вчера беа дел од петтото издание на „Охрид трчаТ – Детска трка“, што се одржа на стадионот „Билјанини Извори“ во организација на АК Охрид ТрчаТ, а со поддршка од Општина Охрид и голем број општествено одговорни компании.
Настанот има за цел да ги мотивира најмладите да спортуваат, да се дружат и да развиваат физички вештини.
Претседателот на Советот на Општина Охрид, Перчо Божиновски, ги поздрави учесниците и истакна дека спортскиот дух се гради уште од најрана возраст, нагласувајќи дека ваквите манифестации имаат големо значење за здравиот развој на децата.
Охрид трчаТ детската трка одамна не е само настан, таа е порака за иднината, за навиките што мора да ги создаваме и за вредностите што сакаме децата да ги носат со себе. Без обврска. Без интерес. Но со огромна љубов, ентузијазам и верба дека секое дете заслужува момент во кој ќе се почувствува важно, среќно и поддржано. Горди сме што годинава ја испративме и петтата генерација првоодделенци од Општина Охрид и Дебрца, велат од АК Охрид ТрчаТ.
Воедно, посочуваат дека најголемата победа не е резултатот, туку кога децата растат со насмевка, спортски дух и чувство дека припаѓаат и се дел од заедницата.
Учеството на трката беше бесплатно, а за сите учесници беа обезбедени маица, финишер медал, вода и пригодни подароци.
OhridNews
