Пет златни, два сребрени и десет бронзени медали освоија текводистите од клубот Хваранг Фист од Охрид на второто коло од Македонската теквондо лига која се одржа викендов во Скопје во организација на Теквондо клуб Бутел од Скопје и Македонската теквондо федерација. Со овој резултат освоија нови 81 бод во лигата.

Хваранг Фист од Охрид водени од тренерот Ацо Јосифоски 5 дан, настапи со 19 натпреварувачи во 3 старосни категории, пионери, кадети и јуниори.

Петар Петкоски, Ѓорѓи Петкоски, Јана Спироска и Ненад Целески, нашиот јуниорски тим очекувано во најдобра форма со 4 злата во своите категории го кренаа нашиот клуб на врвот во јуниорската конкуренција. Дополнително успехот беше дополнет со Јана Спироска и Ненад Целески кои беа прогласени за најдобар јуниор и јуниорка на колото. Одличен беше и Максим Ристески во категоријата пионери -25кг со 3 победи и го освои златниот медал. Пионерите Димитар Грујоски, Христијан Николоски, Ристе Ѓелески, Маријана Илческа, Леона Павлеска, и Љубица Митреска во полуфиналните борби загубија и останаа на бронзениот медал, додека Јоаким Најдески и Радмила Огненоска по одличната победа во полуфиналето, финалето го загубија во последната секунда со пресврт за само 1 поен, посочуваат од клубот.

Додаваат дека бронзени медали освоиле Марија Неделкоска и Анастасија Спироска, а јуниорките Емилија Целеска и Доротеа Најдеска и покрај одличните борби го загубиле полуфиналето и шансата за уште 2 златни медали.

Инаку, за нови бодови во листата се бореа 310 натпреварувачи од 19 клубови.

OhridNews