Шума гори кај Ќафасан. Пожар во полето крај Струга

Огнените стихии во Македонија како да „решиле“ се` да изгорат. После огромниот пожар во битолско кој е донекаде стопиран, на „ред“ дојдоа и струшкиот регион и Ќафасан. Околу 100 хектари дабова и борова шума, непосредно до граничниот премин со Албанија горат, а ветерот кој го менува правецот секој момент сесрдно „помага“ во ширењето на пожарите. Пожарникари од Струга и Охрид, потпомогнати од работници во шумските претпријатија, се борат да го локализираат огнот што кај Ќафасан е веќе стигнат до патот. Но, од она што го видовме на терен, недостига и механизација и опрема, но и луѓе за гасење на пожарите. Градоначалникот Мерко изјави дека нема опасност пожарот да ја префрли планината и да „тргне“ кон селото Радожда и хотелите „Изгрев“ и „Бисер“

Додека градоначалникот Мерко ангажира луѓе и ресурси кај Ќафасан (тој и беше на лице место), пожар од големи размери го зафати и струшкото поле, во близина на селото Враништа. Луѓето од крајпатните фабрики и деловни објекти сами се бореа со стихијата, огнот и густиот чад. Нешто подоцна околу 14.30 на делот зафатен со пожар, од патот гасеше пожарникарен камион. Патот Струга – Дебар беше затворен. Од далечина можеше да се види дека пожарите се шират со голема брзина и спрема селата Враништа и Мороишта.

Ако не се ангажираат повеќе луѓе, односно ако Општината Струга не добие реална помош во гаснењето на пожарите, и` следува драма како на Битола.