Инспекциските служби на Агенцијата за храна и ветеринарство (АХВ) во почетокот на месецов спроведоа 39 вонредни инспекциски контроли во домови за стари лица во земјава. Истите потврдуваат подобрување на безбедноста на храната во домовите.
Со контролите утврдено е дека само еден не бил регистриран како оператор со храна во АХВ за што му е изречена времена забрана за работа, глоба и даден е налог за негова регистрација во Агенцијата. Еден оператор со храна не ги задоволувал хигиенските барања за безбедност на храната, а 4 од контролираните домови за стари лица немале спроведено задолжителен задравствен преглед за вработените лица, велат од АХВ.
За утврдените недоследности, посочуваат, кои се однесувале и на нередовно водење на записи за Добра хигиенска и Добра производствена пракса, недоставување на увид сертификати за спроведени обуки од областа на хигиената на храна, евиденција за набавки, доцнење со спроведување на задолжителни мерки за дезинфекција, дезинсекција и дератизација и други помали недоследности, издадени се и три решенија со наредби за нивно отстранување и две опомени.
За сторени прекршоци од поголем обем изречени се глоби во вредност од 1 550 евра во денарска противвредност за 4 оператори, а само од еден контролиран оператор, нештетно се уништени 6 килограми небезбедна храна, потенцираат од АХВ.
Инаку, при спроведените вонредни инспекциски надзори кај истата категорија оператори во ноември 2024 година, 14 не биле регистрирани како оператори со храна во АХВ, а нештетно уништени биле 40 килограми небезбедна храна. Издадени биле 16 решенија со наредби за отстранување на утврдени недоследности и изречени парични казни на 18 домови за стари лица.
OhridNews
