Според православниот календар, денешниот ден е посветен на маченикот Св. Трифун. Голем број обичаи и ритуали кои се врзани за овој ден, традиционално се пренесени од колено на колено.

Во минатото, 14-ти февруари претставувал најголем ден за бавчанџиите од охридскиот регион, а малкумина од нив се уште ги практикуваат традиционалните ритуали, пркосеjќи му на модерното време.

Житие за Светиот маченик Трифун 

Светиот маченик Трифун роден е во селото Кампсада во Фригија од сиромашни родители. Во детството беше чувар на гуски. И уште од детството врз него беше голема Божја благодат и можеше да исцелува болести кај луѓето и кај животните и да изгонува бесови. Во тоа време со Римското царство завладеа царот Гордијан, чијашто ќерка слезе од умот и со тоа го фрли царот во голема жалост. Ниеден лекар не можеше да ѝ помогне на лудата Гордијана. Тогаш демонот прозборе преку девојката и рече дека освен Трифун никој не може да го истера. После многумина Трифуни ширум царството, по Божја Промисла го повикаа и овој млад Трифун. Го доведоа во Рим и тој ја исцели царската ќерка. Царот му подари многубројни дарови, а тој на враќање им ги раздели на сиромасите. Потоа ова свето момче продолжи да чува гуски и да Му се моли на Бога. Кога се зацари христоборниот Декиј, Свети Трифун беше малтретиран и свирепо измачуван заради Христа. Но тој со голема радост ги поднесе сите мачења, велејќи: „О кога би можел да се удостојам во оган и маки да завршам за името на Исус Христос, мојот Бог и Господ!“ Маките не му наштетија ни малку и најпосле мачителите го осудија на смрт со меч. Му се помоли на Бога и издивна во 250 година.

Од друга страна, благодарение на масс-медиумите младите од земјава на 14-ти февруари се повеќе го слават и католичкиот „Св. Валетнин“. Иако многумина негираат дека го чествуваат „Денот на вљубените“, охридските трговци велат дека како и секоја година, очекуваат младите охриѓани да купат дел од нивните производи и да ги подарат на љубените.

Пандан на овој католички празник во православието, според многумина е денот посветен на светиците „Вера, Љубов, Надеж и мајка Софија“ кој се чествува на 30-ти септември.

OhridNews